ភ្នំពេញ៖ នាយករដ្ឋមន្ត្រីកម្ពុជាបានចូលរួមរំលែកទុក្ខក្រុមគ្រួសារលោក នុត ណារ៉ាង អតីតរដ្ឋមន្ត្រីក្រសួងវប្បធម៌ ដែលបានទទួលមរណភាពកាលពីថ្ងៃទី៩ ខែសីហា ឆ្នាំ២០២៣ ក្នុងជន្មាយុ ៨៧ឆ្នាំ ដោយរោគាពាធ។

សម្ដេចចាត់ទុកការបាត់បង់លោក នុត ណារ៉ាង គឺជាការបាត់បង់ដ៏ធំធេងនូវឥស្សរជនមួយរូប ដែលបានលះបង់កម្លាំងកាយ ចិត្ត និងបញ្ញាស្មារតីក្នុងការចូលរួមចំណែកការពារ ថែរក្សានិងលើកតម្លៃបេតិកភណ្ឌ វប្បធម៌ និងសម្បត្តិវប្បធម៌ជាតិ ដើម្បីអភិវឌ្ឍន៍វិស័យវប្បធម៌ និងជំនឿទំនៀមទម្លាប់ ប្រពៃណីរបស់ ព្រះរាជាណាចក្រកម្ពុជា។

សម្ដេចថា៖ «ខ្ញុំនិងភរិយាសូមឧទ្ទិសបួងសួងដល់ដួងវិញ្ញាណក្ខន្ធឯកឧត្តម នុត ណារ៉ាង សូមឆាប់បានចាប់ កំណើតកើតក្នុងសុគតិភពគ្រប់ៗជាតិ កុំបីឃ្លៀងឃ្លាតឡើយ»។

ជាមួយគ្នានេះសម្ដេចក៏បានថ្លែងអំណរគុណចំពោះលោកស្រី នុត សុភី ដែលបានពាំនាំបណ្តាំរបស់លោក នុត ណារ៉ាង ប្រកបដោយពាក្យពេចន៍ដែលពោរពេញដោយមនោសញ្ចេតនានិងការជឿទុកចិត្ត បន្តគាំទ្រដល់រាជរដ្ឋាភិបាលនិងគណបក្សប្រជាជនកម្ពុជាផងដែរ៕